Apam legendaris

melihat foto jualan apam

ulun jadi keingatan lagi SD ulun bejualan apam ni

subuh jam 5:30 ulun sudah tulak bejaja apam ni pakai nyiru

panas panas apamnya olahan mama ulun

bila ada yang menukar, ulun sambil melihat jam dirumah urang tu

sudah jam berapa

bila jam 7 sudah habis, ulun himung lakas ulun bulik

bila setengah 8 masih belum habis ulun gelisah

bulik ke rumah ulun bukah bukah liwar laju sekira lakas sampai dirumah, lakas beganti baju sekira sawat sakulah

rancak ai ulun talambat sakulah

rancak ai ulun disariki guru

rancak jua tadiri

tapi kada papa ai

tetapai ulun semangat terus bejualan

ulun ketuju bejualan

ulun ketuju banar bacari duit gasan kuitan

imbah bulik sakulah, ulun bajualan opak pulang

sampai kamarian

bulik bejualan opak tu, ulun kada langsung ke rumah

ulun bacari sulur keladikah, bacari genjer kah, bacari kangkung kah, becari kayu gasan mama

pokoknya ulun tu bila bulik kerumah

kada bisa kosong tangan

pasti ada nang ulun bawa bulik

suah jua pas kadada yg ulun bawa

ditangah jalan padang sunyi ada pohon lombok sing labatan

daripada kadada yang dibawa, ulun cabut ai pohon lombok tu

sapuhunan, batang , akar, daun wan buahnya

Bahari tu ulun sibuk banar

dari baisukan ,siang, kamarian sampai ka malam

bila malam tu mun abah ulun sdh guring

ulun hancap begimit bukah sekira kada ketahuan abah

ulun wan kawanan ke perikanan pelelangan iwak di banjar raya

kami memutiki iwak yang tagugur dijalan

biasanya iwak tu diangkut pakai basket/keranjang dari kapal ke pelelangannah imbahanu tagugur seikung dua ikung iwaknya

inya dibariakan haja diambil

daripada tajajak

kulihannya sapalih dijual, sapalih gasan mama

makanya mama ulun hinip ja ulun bajalanan tangah malam

ulun buliknya mambawa iwak

subuh bulik, sebelum abah bangun sakira kada ketahuan abah.

kayaitu ulun bahari wan kuitan

jangan handak mambunguli

minta duit ja kada purun

mun handak apa - apa bapikir bacari saurang duitnya

jauh pulang batangsa

jaka kawa ulun nang mambawakan sidin duit banyak banyak

bila ditakuni napa cita-cita

"handak mambawa mama abah ka makkah"

kadada uyuhnya bila urusan mambantu kuitan

kadada supannya bila pacang jadi duit gasan kuitan

Dalam rangka meningkatkan kwalitas dan kwantitas Web ini, silahkan untuk memberikan Coment, baik Keritik Maupun Saran pada kolom Komentar dibawah ini.Atas nama Manegemen hobbyimul.com kami Haturkan Terimakasih. Jangan lupa Like and Subcribe Channel Kami: https://www.youtube.com/channel/UCWf6mFpnCsJj3Lu8z10_SYQ?view_as=subscriber